Nauram iti maysa a yate bayat ti panaglayagna iti kabaybayan a sakupen ti Tingloy, Batangas idi kalman, Enero 27, 2026.
Maibasar kadagiti immuna a report, naglayag ti Motor Yacht (M/Y) Allusive manipud Puerto Galera ken agturong idiay Punta Fuego, Nasugbu, Batangas tapno makipaset iti maysa a yacht sailing event.
Ngem timpuar iti uram a mapapati a nagtaud iti engine room gapu iti posible nga electrical failure, a maipasidong iti kanayunan nga imbestigasion.
Nirespondehan ti Philippine Coast Guard (PCG) District Southern Tagalog iti nauram a yate ken natalged a naiyakar dagiti pito a Filipino crew members a sakay ti yate.
Naiturong dagiti naisalakan a tripulante iti Batangas Port para iti medical assessment ken awan ti naipadamag a nasugatan.
Naguyoden iti yate iti igid ti baybay ken masuksukimat tapno masigurado nga awanen ti pangta daytoy iti panaglayag.###
