Nangituding ti Department of Education (DepEd) ti nasapa a panagrehistro dagiti agad-adal kas panagsagana para iti school year 2026-2027.
Segun ti DepEd, maisayangkat ti nasao nga aktibidad manipud Enero 31 agingga Pebrero 15, 2026.
Saklawen ti nasapa a panagrehistro dagiti estudiante a makaturpos ti Grade 6 ken sumrek ti Grade 7 wenno Junior High School, dagiti estudiante nga umakar wenno agpalista ti Senior High School, kasta met dagiti ubbing nga agdadamo a sumrek iti Kindergarten.
Para iti panagrehistro, kasapulan a mangipasa ti kopia ti birth certificate ken kopia ti card wenno school record ti estudiante.
Saan pay nga actual enrollment iti early registration, no di ket maysa a data-gathering activity tapno maamuan iti mapatta-patta a bilang dagiti estudyante iti sumaruno nga school year.
Iti panagrehistro ket mabalin ti personal wenno walk-in registration ken online babaen ti link nga ited dagiti mannursuro ken pagadalan.
Maipatpatungpal iti programa babaen ti nasinged a koordinasion kadagiti pagadalan, mannursuro, barangay officials, ken dadduma pay a maseknan tapno masigurado ti organisado, napartak, ken naannayas a panagrehistro, nangruna kadagiti nasulinek ken natao a lugar.
Dakkel iti tulong ti nasapa a panagrehistro tapno masigurado ti kinaumiso ti datos dagiti agad-adal, nga agserbi a pangibasaran iti nasapa a pannakaisagana dagiti silid-pagadalan, learning resources, textbooks, ken teaching loads dagiti mannursuro.###
