Nakaawiden iti pagtaenganda idiay Minneapolis ti lima-anyos a ni Liam Conejo Ramos ken ti amana a ni Adrian Alexander Conejo Arias, kalpasan nga i-detain isuda ti Immigration and Customs Enforcement (ICE) idiay Texas, segun kenni Texas Congressman Joaquin Castro.
Inpakaammo ni Castro idi Domingo (aldaw idiay America) a dagiti agama ket nawayawayaanda manipud iti Dilley Detention Center ken simmangpetdan idiay Minnesota.
Naammuan nga iti pannakaruk-at da ket dumteng kalpasan a maipaayan iti pamilya ti emergency order ti US District Judge Fred Biery.
Binabalaw ni Biery iti pannakaibalud ti ubing a maibagbaga a gapuanan ti “perfidious lust for unbridled power” ken ipanawagan ti naur-urnos ken makatao a proseso ti immigration.
Depensa ti Ice ket saanda a puntirya iti agama ken naiparna laeng a pinanawan ti ama iti anakna, ngem impaganetget ti abogado ti pamilia a sinurot da iti umiso a proseso ti asylum, simrek idiay Estados Unidos idi 2024 iti legal a wagas, nagusar ti CBP One app, dimmar-ay kadagiti appointment, ken indatagna iti bagida iti Customs and Border Protection.
Adayo daytoy iti ibagbaga ti Department of Homeland Security (DHS) nga ilegal a simrek ti agama idiay Estados Unidos.
Iti naisina a post ti ICE iti social media, inlibakda a naibalud iti ubing.
Indepensa met ti DHS ken ICE nga iti operasionda ket maibagbaga a timmakas ti ama ni Liam, nupay inlibak ti pamilia iti alegasion.
Kabayatanna, nangipost met iti social media ni Minnesota Congresswoman Ilhan Omar a mangkabkablaaw iti iti agama.###
