Patien ti National Bureau of Investigation nga adda pay laeng ditoy pagilian iti pugante ken negosiante a ni Charlie ”Atong” Ang.
Iti interview kenni Atty. Angelito Magno, acting director ti nasao a bureau, agtultuloy iti ‘manhunt operations’ ti ahensia tapno mabirukan ken maamuan iti lokasion ti pugante a negosiante nga iti agdama ket saan pay laeng a nabirbirukan.
Makikokoordinardan kadagiti nadumaduma nga embahada ti pagilian no bilang ta adda ti impormasion a mangibagbaga nga isu ket nakapanawen iti pagilian.
Nupay kasta, gapu iti kaawan ti opisial nga statement manipud ti Department of Foreign Affairs ken Bureau of Immigration, impaganetget na a posible nga adda pay ditoy pagilian ni Ang.
Kitkitaen ti National Bureau of Investigation dagiti impormason a maaw-awatda maipapan iti lokasion wenno paglemlemmengan ti pugante.
Pinaglibakan ni Magno iti alegasion a koneksion dagiti sumagmamano a personnel kenni Ang.
Pinaglibakanna iti isyu a maipagarup nga adda ti panaggandat a panangpasuksuk kadakuada.
Maipalagip a ti negosiante a ni Charlie ‘Atong’ ket napaulogan ti ‘arrest warrant’ manipud kadagiti Regional Trial Courts ti Lipa, Batangas, ken Sta. Cruz, Laguna.
Sangsanguenna iti kaso a ‘kidnapping with homicide’ ken ‘kidnapping with serious illegal detention’ a mainaig iti pannakapukaw dagiti mammallot.###
