Raraemen ti Malacañang ti perspektibo ken addang ti Kongreso seknan ti singasing a resolusyon nga ideklara kas persona non grata ni Chinese Ambassador Jing Quan kasaruno ti nabara a diskusyon na kontra kadagiti opisyales ti Pilipinas.
Segun kenni Palace Press Officer, Undersecretary Claire Castro, adda ti bukod a perspektibo ken mandato dagiti mamanday-linteg maipapan iti problema kasta met a nawaya ti Kongreso a dakamaten ken ilungalong dagiti pakaseknan da.
Inlawlawag na nga agtaltalinaed a nalawag ti polisiya ti Presidente seknan ti Department of Foreign Affairs (DFA) nga itandudo ti diplomasya ken nakapia a pannakiuman iti China babaen ti diplomatiko a wagas.
Ammo dagiti mamanday-linteg nga iti panangideklara a persona non grata ti maysa a gangganaet nga opisyal ket adda iti bileg ti Presidente.
Saan met a naibatad a ti nagdumaan ti ehekutibo ken lehislatura ket saan a pakaibatugan ti political impasse, nu ketdi paset laeng ti demokratiko a proseso ken nawaya a diskurso iti uneg ti gobierno.
Impakaammo a tarigagay latta ti Marcos administration iti kinakapia, ken interes ti Pilipinas.
