LA UNION – Hustisiya iti iyik-ikkis ti pamilya Cachero iti tengnga ti panag-leddaang dagitoy gaputi saan da a ninamnama a pannakatay ti maysa a miyembro ti pamilya da.
Segun kenni Telesporo Cachero, ama ti 29-anyos a balasang a biktima, nasakit ti nakem da ken nu mabalin la koma kunana nga aramiden met ti napasamak iti tao a nangpatay ti anak na.
Maipalagip a naipadamag a “missing” ni Thelma Liza idi Enero 30, aldaw ti Biernes.
Kalpasan ti uppat nga aldaw wenno Pebrero 2, 2026 nasarakan ti nagpukaw a biktima ngem maysan a bangkay.
Nakita ti maysa a mannalon a mapan koma agipastor ti taraken a nuang, agarop alas-7:30 ti bigat ti Lunes, Pebrero 2, idiay Sitio Mallare, Barangay San Isidro, Naguilian.
Sakbay ti insidente, inistorya iti Bombo Radyo iti ama ti biktima a ni Telesporo Cachero, a dimmawat daytoy iti pag-plete na, agsipudta nagbukel a sangaribu tI kuwarta na. Daytan iti maudi a panagpatang da nga ag-ama.
Kabayatanna, mabuya met iti CCTV footage iti pagtaengan ti kasinsin ni Thelma iti pannagna na nga agturong koma iti trabaho a nakasuot ti uniporme. Napetsaan daytoy iti 2026/01/30 iti oras 08:09:40AM – aldaw a maudi isunan a nakita a nabiag.
Kumidkiddaw ita ti tulong ti pamilya Cachero kadagiti posible a nakakita ti krimen a tumulong iti panang-solbar ti kaso tapno maipaay ti hustisiya iti pannakatay ti anak na.
