BR LA UNION – Dua a mammanday linteg manipud Northern Luzon ti maipagarop nga utek iti nadiskubre a bilyon a pisos nga ilegal nga operasyon ti sigarilyo ditoy pagilian, segun kenni Interior Secretary Juanito Victor “Jonvic” Remulla idi kalman, Huwebes, Pebrero 5, 2026.
Inaramid ni Secretary Remulla iti waragawag kalpasan ti inaramid nga operasyon dagiti operatiba iti maysa nga ilegal a pabrika ti sigarilyo idiay Barangay Panipuan, Mexico City, Pampanga.
Iti nasao nga operasyon, inarestar ti Criminal Investigation and Detection Group (CIDG) ti innem a Chinese national ken 60 a Pilipino ti naisalbar, a mapapati a biktima ti human trafficking.
Segun kenni Remulla, iti manufacturing plant ket nag-operate nga awanan ti maiyannatop a lisensya ken permit iti unos ti bulan ti Enero 2026 ken maipagarop a nakapartuat ti nasurok-kumurang a P4.5 billion a balor ti sigarilyo.
Imbaga ti sekretaryo nga adda impormasyon iti Department of the Interior and Local Government (DILG) a nangrugi ti operasyon idi Enero 1, bayat a naipasdek pay dagiti makina idi Disyembre sakbay a simmangpet dagiti Chinese national.
Segun iti DILG chief, dagiti Pilipino a mangmangged ket biktima ti human trafficking.
Imbaga ni Remulla a napilit nga agtrabaho dagitoy nga awanan ti suweldo ken saan a makatao a kondisyon.
Impaganetget ni Remulla a ti human trafficking ken panaglabsing iti Anti-Agricultural Sabotage Act ket agpada a non-bailable offense.
Binigbig ti DILG dagiti incorporator ti warehouse a tallo a Pilipino ken dua a Korean national.
Segun kenni PNP Criminal Investigation and Detection Group (CIDG) Director Robert Morico II, napatulodan ti subpoena ti maysa kadagiti Pilipino nga incorporator.
Iti sabali a waragawag, imbaga ti Philippine National Police (PNP) a kaar-arngi dagiti peke a sigarilyo a nakumpiskar idiay Pampanga kadagiti produkto a nadiskubre iti immun-una nga operasyon idiay Balete, Batangas idi Disyembre 31, 2025 ken idiay Malabon idi Enero 1, 2026.
Segun kenni Remulla, mapatta-patta a nasurok P30 billion ti mapukpkaw iti kaha ti gobyerno kada tawen gaputi a ilegal a kalakalan ti sigarilyo.
Agtultuloy iti imbestigasyon dagiti otoridad tapno maamwan nu kasatnu kalawa iti operasyon ken sungsungbatan dagiti karaman, kabilang dagiti maatap nga opisyal ti gobyerno.
