Temporario nga intalna ti Philippine Coast Guard(PCG) ti isaysayangkat da a search and rescue operations iti MV Trisha Kerstin 3 idiay Basilan.
Segun kenni Spokesperson, Captain Noemie Cayabyab, naituloy pay idi kalman, Pebrero 5 ti operasyon ngem kasapulan a maisardeng gapo iti rungsot ti bagyo.
Ita met nga aldaw ket kasapulan nga agtalinaed da kadagiti sangladan tapno masigurado ti kinatalged dagiti personnel, nangruna kadagiti divers.
Impaganetget ni Captain Cayabyab nga apaman sumayaat ti paniempo ket dagos da nga ituloy ti operasyon kasta met iti full deployment kadagiti mausar nga assets.
Sangapulo a tattao pay dagiti mapukpukaw kas maibasar ti orihinal a litaan dagiti naisalakan ken nakarekobre.
Dua a bangkayen ti naitakdang dagiti divers manipud idi natakuatan da ti lokasyon ti limned a barko. Naipit dagitoy ken karaman a limned iti uneg ti baybay.
