Impasigurado ti Philippine Ambassador to Washington Jose Manuel Romualdez a saan a baybay-an ti Estados Unidos iti Pilipinas iti panangkontra ti kumarkaro nga agresion ti China iti mapagsusupiatan a kabaybayan uray no agsasarita ni US President Donald Trump ken Chinese President Xi Jinping tapno marisut ti susikda.
Segun kenni Romualdez, agtalinaed a natibker iti pagilian iti panangdepensa ti soberanya, ngem silulukat met ti pagilian nga urnusen ti relasion iti China para ti dakdakkel a panagtagilako ken relasion pang-ekonomiya.
Ti Estados Unidos ken Pilipinas iti kangrunaan a mangkonkontra iti agresion ti China nga agus-usar kadagiti water cannons, flares, ken pananglapped kadagiti otoridad iti baybay ken tangatang.
Nupay adda dagiti panagbuteng iti posible a U.S.-China rapprochement, impanamnama ni Romualdez a pumigpigsa ti relasion pangseguridad ken depensa, ken addaan iti U.S. ti pondo para iti modernisasion ti militar ti Pilipinas.
Iti laksid ti tension, panggep ti Pilipinas a pasayaaten iti relasion iti China kadagiti isyu a saan a kontrobersial kas iti panagbalbaliw ti klima, panagpataud, ken alternatibo nga enerhia.###
