Impaganetget ni Senate President Pro Tempore Panfilo Lacson nga awan iti umdas a pammaneknek a mangiraman kenni House Speaker ken Leyte Representative Martin Romualdez kadagiti anomalya dagiti flood control projects.
Kinuna iti senador a nupay adda dagiti alegasyon a naibutaktak kadagiti anomalya ti flood control, awan met iti umdas nga ebidensiya a mangipakpakita wenno mangpaneknek a karaman isuna iti iskandalo.
Sakbayna ket ti rimuar a report ti Senate Blue Ribbon Committee a nangirekomendar iti panangipila ti kaso kontra kada Senador Chiz Escudero, Sen. Jingoy Estrada, Sen. Joel Villanueva, ken dadduma pay a dadakkel a nagan.
Nupay kasta, segun iti partial report ket nabaliwan daitoy ken nairekomendar ti panangisayangkat ti preliminary investigation kontra kadagiti nadakamat a nagnagan; saan a karaman ti revised report ti nagan ni Romualdez.
Inlawlawag ti Senador Lacson a kas chairman ti komite, ti rekomendasyon para kenni Romualdez ket ti panagtultuloy ti fact-finding efforts ken posible a panangbukel ti kaso kontra kenkuana.
Karaman ditoyen ket ti financial scrutiny a napateg para ti Anti-Money Laundering Council (AMLC) agsipud ta ti laeng iggem a lead ti komite ket ti testimoniya ti kontrobersyal a witness a ni Orly Guteza.
Agtaltalinaed met kunana iti posibilidad a mabaliwan latta ti estado ni Romualdez iti pinal a committee report kabayatan nga agtultuloy ti imbestigasyon ti Senado.
