Inwaragawag ni Presidente Ferdinand Marcos Jr. iti nasimsimple ken naparpartak a proseso para iti subsidya iti koriente ken pannakaipatungpal ti solar net-metering para kadagiti pamilia a Pilipino, kangrunaan dagiti adda iti marginalized sector.
Iti naangay a “Collective Response to Presidential Commitments In the Energy Sector” iti Meralco Theatre, impaganetget ti Presidente iti panggep ti administrasion nga aramiden a makabael ken mapagtalkan iti serbisio ti koriente babaen ti panangikkat kadagiti komplikado a burukrasia.
Imbinglay pay ti Presidente iti pannakaipatungpal ti automatic registration dagiti amin a benepisiario ti Pantawid Pamilyang Pilipino Program (4Ps) babaen ti Lifeline Rate Subsidy Program (LRSP).
Agarup 334,000 wenno 11 a porsiento iti pakabuklan a 3 million a benepisiario ti 4Ps iti agnumar iti diskuento gapu kadagiti sigud a komplikado a kasapulan.
Saan a rumbeng a dagiti Pilipino iti mangkamkamat ti tulong, no di ket ti tulong ket isu ti rumbeng nga umasideg kadagiti umili.
Iti sidong ti baro a threshold, dagiti pamilia a paset ti 4Ps nga agkonsumo ti 50 kilowatt-hours (kWh) wenno nababbaba iti tunggal bulan ket makaawat ti 100% a diskuento iti bill. Mabalin met nga agaplikar dagiti pamilia a sakop ti poverty threshold uray no saand a miembro ti 4Ps.
Malaksid iti subsidy, linuktan pay ti Presidente iti naparpartak a ruangan para ti Net-Metering Program.
Daytoy a programa iti mangpalubos kadagiti babbalay nga addaan ti solar panel nga ilako iti sobra a korienteda nga agsubli iti grid tapno maksayan iti bayadan-da.
Nangipaulog ti DOE, DILG, ken DPWH ti Joint Memorandum Circular para iti pannakausar dagiti standardized application forms kadagiti LGU.
Binilin ti Energy Regulatory Commission (ERC) dagiti distribution utilities (DUs) a leppasen iti proseso ti koneksion iti uneg laeng ti 20 working days.
Binigbig pay ti Chief Executive iti napateg nga akem ti MERALCO iti panangidur-as kadagitoy a panggep, pakairamanan ti Terra Solar Project a mangpalawa iti renewable energy capacity ti pagilian babaen ti large-scale solar ken battery storage.
Inallukoy ni Presidente Marcos dagiti amin a Pilipino a gundawayana dagiti baro nga inisyatibo tapno masigurado ti nataltalged ken nalaklaka a suplay ti enerhia para kadagiti pamiliada.###
