Impadamag ti Department of Foreign Affairs (DFA) nga adda ti uppat a Pilipino a maipagarup a nakigubat para iti Russia nga agdama nga adda iti kustodiya ti Ukraine kas prisoners of war.
Segun ti ahensia, adda lima a kaso nga iggem ti DFA a mainaig kadagiti Pilipino a makunkuna a nagbalin a mersenaryo iti kangitingitan iti susik ti Russia ken Ukraine.
Nupay kasta, nagkedked ti ahensia a mangipaay ti kanayonan a detalye maipapan kadagitoy.
Segun kenni DFA spokesperson Angelica Escalona, napasingkedan ti pannakakautibo ni Raymon Gumangan idiay Ukraine.
Nakasaritan ti ahensia iti pamilia ti pimmusay a Pilipino ngem saan pay a mabalin a mangibinglay dagiti detalye kas maitunos iti kiddaw ti pamilya.
Makaaw-awat met ti DFA iti nadumaduma nga impormasyon no kasano a na-recruit dagiti Pilipino a makipaset iti rinnupak.
Adda ti maipatpatungpal a deployment ban idiay Ukraine, ngem saan daytoy a maiparit idiay Russia.
Maallukoy ti publiko nga agbalin a naannad kangrunaan kadagiti maidiay a tarabaho online.
Ni Gumangan ket maipagarup a nakabirok ti online job offer a nangikari ti nangato a sueldo idiay Russia kas logistics personnel, ngem idi nakadanonda sadiay, napirmaan isuna ti kontrata iti Ministry of Defense ti Russian Federation ken naideploy iti combat role kas paset ti 51st Parachute Regiment.
Kabayatanna, kiniddaw ni Senador Erwin Tulfo, chairman ti Senate Committee on Foreign Relations, a tulongan ni Gumangan tapno mawayawayaan iti pannakaibaludna.
Narikut iti sitwasion gapu ta saan a karaman ti Pilipinas kadagiti pagilian a karaman iti riribuk.
Naipakaammo metten iti gobierno ti Ukraine ken Russia iti sitwasion ni Gumangan.
Kabayatanna, nakiuman ni Tulfo kenni Yuliia Fediv tapno pagsaritaanda ti kaso. Inkari ti envoy a tumulong a mangidanon iti kiddaw ti Pilipinas ken pamilia ni Gumangan iti gobiernoda.###
