Viral ita ti maysa a Japanese macaque a napanaganan ti Punch-kun wenno Punch iti Ichikawa City Zoo gapu ti companion wenno gayyem na a maysa nga stuffed orangutan.
Dagos a nangaramid ti addang dagiti zookeeper iti sitwasion ni Punch kalpasan nga inabandona daytoy ti inana.
Segun ti zookeeper a ni Kosuke Shikano, kadawyan kadagiti Japanese baby macaque nga asideg iti inada para ti seguridad ken pagkasapulan, isu nga imbalakadda nga ikkan daytoy ti kadua ken napilina ti orangutan.
Iti video a nagwaras iti social media, makita a kanayun nga imet ni Punch iti stuffed toy uray dakdakkel daytoy ngem kenkuana, a nangray-aw kadagiti agturtutong sadiay ken kadagiti netizens a nasagid ti riknana.
Segun kenni Shikano, nalabit ket nabati ni Punch gapu ti nakaro a pudot idi Hulyo no katno a naiyanak isuna.
Saan met a maliklikan a mabully ni Punch sipud idi naiyakar daytoy iti zoo, ngem segun kadagiti zookeeper, paset daytoy iti proseso ti panangisuro kenni Punch kadagiti kapulina.
Iti agdama naglayos dagiti fans ni Punch kas dagiti sumagmamano a social media personality iti Hollywood a nangipeksa iti panagdanag iti nasao a sunggo ken interes a gatangen daytoy idiay Tokyo tapno maliklikan laeng ti panangbully a mapadpadasanna kadagiti nataengan a bakes.
Kabayatanna, maysa a Swedish furniture brand iti nangipaay dagiti stuffed toy iti nasao a zoo.###
