Posible nga agbalin a naan-anay a linteg ti impila ni Ousmane Sonko, Prime Minister ti Senegal, a maysa a singasing a gakat a mangdusa para ti same-sex relations ti agingga 10 a tawen a pannakaibalud.
Segun kenni Sonko, ti siasinoman a mapaneknekan nga agaramid ti “act against nature” ket madusa ti manipud lima agingga 10 a tawen a pannakaibalud, manipud iti agdama a maysa agingga lima a tawen laeng.
Nakapasan iti National Assembly of Senegal ti gakat kasaruno ti panangaprobar ti gabinete. Nailungalong daitoy gapo kadagiti serye ti pannakaarestar kadagiti miembro ti LGBT community nga umab-abuso kadagiti menor de edad. Kinuna ni Sonko a masakopan ti linteg ti agpada a same-sex relations ken child sexual abuse. Innayon na pay a nu karaman ti menor ket nadagdagsen iti dusa.
Nakailanad iti probisyon ti nasao a gakat iti tallo agingga pito a tawen a pannakaibalud kadagiti mangitandudo ken mangiwaragawag ti adbokasiya para ti same-sex relations. Masansan ket kontra kadaitoy dagiti relihiyoso a grupo nga impaganetget a ti kastoy nga aramid ken nagtaud kadagiti makin-laud nga impluwensya.
Nabayagen a saritaan idiay Senegal ti LGBTQ rights. Kadagiti naglabas a tawtawen ket napartuat dagiti serye ti demonstrasyon a kumidkiddaw ti nadagdagsen a pannusa kadagiti lallaki a makirelasyon ti pada da metlaeng a lallaki.
