BR LA UNION – Maysa a Filipina caregiver ti natay idiay Israel bayat a tul-tulungan na ti alaga na nga agturong iti bomb shelter.
Kinumpirma mismo daytoy ni Presidente Ferdinand Marcos Jr. ita nga aldaw ti Domingo, Marso 1.
Iti maysa a video message iti social media account na, imbaga ti Presidente a ti biktima ket nabigbig a ni Mary Ann Velasquez De Vera, taga-Pangasinan, natay kalpasan a natirwan ti shrapnel manipud iti nagsuwek a drone ti Iran.
Malaksid kenni Mary Ann, saan met a nakalasat iti employer na manipud iti nasao nga airstrike.
Innayon pay ti Presidente, ti insidente ket kinumpirma ti asawa na a maysa met laeng nga OFW idiay Israel.
Inkari ti gobiyerno a maipaay amin a kasapolan a tulong iti pamilya ti natay a caregiver.
Maipalagip a ti insidente ket kasaruno ti joint military operations ti Estados Unidos ken Israel kontra Iran idi Sabado, a nangpakaru ti tensyon iti rehiyon.
Segun iti militar ti Israel, bimmales ti missile strikes iti Iran kalpasan ti inyuswat da nga operasyon.
