BR LA UNION – Mabalinen nga usaren ti pondo ti Department of Agriculture (DA) a nairanta kas fuel subsidies para kadagiti mannalon, kagiddan ti agtultuloy a panagngato ti presyo dagiti produkto ti petrolyo.
Segun kenni Agriculture Spokesperson Assistant secretary Arnel De Mesa, addan ti guidelines ti ahensiya nga agserbi a giya iti pannakaiwaras ti nasao a tulong.
Karaman ditoy ti panagbalin a kameng ti Registry System for Basic Sectors in Agriculture (RSBSA), kaadda dagiti farm machineries a mausar iti panagmula, kaadda dagiti bilog a pagkalap nga addaan iti gross tonnage a saan a lumbes iti 3 a tonelada, ken dadduma pay.
Segun kenni De Mesa, adda P150 million a nakalatang para iti fuel subsidy manipud iti 2025 budget ti ahensiya.
Kinunana a saan a nausar ti nasao a pondo idi napan a tawen ken mabalin pay laeng nga usaren agingga iti bulan ti Disyembre.
Ti P150 million ket patas a pagbibingayan dagiti mannalon ken mangngalap.
Iti agdama, umabot iti P100 million ti nai-download manipud iti DA ken mabalin nga usaren iti aniaman nga oras.
Apaman a maibus ti P100 million, masapul nga umuna a kiddawen ti DA ti nabati a P50 million manipud iti Department of Budget and Management.
Segun kenni De Mesa, umabot iti 15,000 a mannalon ken 28,000 a mangngalap ti manamnama a mabenepisiaran iti nasao a pondo, ken iti inisyal a plano, makaawat ti tunggal mannalon iti P5,000 idinto a dagiti mangngalap ket makaawat iti sag-P3,000.
Aminado ti opisyal a saan nga umdas ti nailatang a pondo, gapu iti kaadu dagiti mangngalap nga agkasapulan iti tulong bayat a kumarkaro ti gubat idiay Middle East.
Inlawlawag ti opisyal a limitado ti pondo iti nabati a fuel subsidy fund idi 2025 gaputa awan met ti kapada a pondo a nailatang para ita tawen 2026.
