BR LA UNION – Natalged a naiyakar idiay siyudad ti Van idiay Turkey dagiti 11 nga Overseas Filipino Workers (OFWs) manipud Iran iti tengnga ti kumarkaru a tensyon idiay Middle East, segun iti Department of Foreign Affairs (DFA).
Segun iti DFA, naisayangkat ti panangiyakar dagiti Pilipino babaen ti koordinasyon dagiti embahada ti Pilipinas idiay Tehran ken Ankara, ken nakatuding nga agsubli da ditoy Pilipinas iti sumaganad nga aldaw.
Siniguro ti ahensya nga agtultuloy ti panangtulong da iti aganay 800 a Pilipino nga agdama nga agnanaed idiay Iran ngem kayatdan ti agawid ditoy pagilian.
Mainaig ti daytoy, binalakadan ti DFA dagiti Pilipino nga agkasapolan ti tulong a dagus a maki-koordinar iti embahada babaen iti opisyal a hotline ken social media channels.
Kabayatanna, maibasar iti datos ti gobyerno, adda pakabuklan a 1,979 a Pilipino manipud iti siyam a pagilian idiay Middle East ti kayat dan a ma-repatriate, kaadwan ket manipud idiay Kuwait nga addaan ti 633 OFWs.
Nupay kasta, agtaltalinaed a nakarikep iti airspace iti sumagmamano a paset ti rehiyon gaputi agtultuloy a gubat.
