Sinegundaan ni Mamamayang Liberal Party-list Rep. Leila De Lima ti waragawag ni sigud a Sen. Antonio Trillanes IV a posible a dagiti Duterte ti adda ti likudan ti panagparang iti publiko dagiti nagpaam-ammo a 18 nga ex-Marines.
‘Plausible basis’ kunana ti maipapan ti topiko agsipud ta Duterte metlaeng ti agnumar kadagiti rebelasyon wenno alegasyon ti korapsyon dagitoy a mapapati a sigud a miembro ti Philippines Marine Corps.
Agtalek ni Rep. De Lima a panggep laeng ti panangipubliko ti nilaon ti ‘joint-affidavit’ nga iyakar ti atensyon ti publiko kadagiti problema a sangsangwen ti kampo ti Duterte.
Innayon na pay ti ‘timing’ a panagdengngeg ti ‘impeachment’ ni Vice President Sara Duterte ken ti kaso ni sigud a Presidente Rodrigo Duterte sadiay International Criminal Court.
Gapo kadaitoy ket impaganetget ni Rep. Leila de Lima a nasken nga agsungbat dagiti mangiwarwaras ti panangdadael kontra kenkuana, nangruna kadagiti nagkuna nga isuna ket nakaawat ti ‘paper bag’.
Kinunana pay a naaramid ken napadasan nan ti kastoy idi ken saan nan nga ipalubos a maulit pay.
