Sinungbatan ti Malacañang iti waragawag ni Bise Presidente Sara Duterte a makapungtot dagiti Pilipino iti pannakaarestar ken pannakaiyeg ni sigud a Presidente Rodrigo Duterte idiay The Hague.
Iti interview idiay Davao City, kenuna ti Bise nga adu a Pilipino iti agtaltalinaed a makapungtot iti napasamak ken saan a mapukaw daytoy aginggana saan a maisubli iti sigud a Presidente ditoy Pilipinas.
Segun kenni Palace Press Officer Claire Castro, mabalin nga isu iti panagkita ti Bise Presidente gapu ta sumangsango iti amana ti crimes against humanity iti International Criminal Court (ICC).
Nupay kasta, impaganetget ni Castro a saan a mabalin nga ibaga nga amin a Pilipino ket addaan ti agpapada a rikna iti isyu.
Kenunana nga adda met dagiti sektor ti komunidad nga agtultuloy nga agsapsapul ti hustisia para kadagiti biktima ti maipagarup nga extrajudicial killings (EJK) a naisilpo iti war on drugs ti napalabas nga administrasion.
Innayon pay ti Malacañang a dagiti kaso a naipila kontra iti sigud a Presidente iti International Criminal Court (ICC) ket nagtaud kadagiti reklamo nga inpila ti sumagmamano a Pilipino a mamati a saanda a nagun-od iti tartarigagayanda nga hustisia iti uneg ti pagilian.###
