Kagiddan iti mapaspasaran a kinangina dagiti produkto a petrolyo ditoy pagilian gapu iti agtultuloy a gubat idiay Middle East, nangipaay iti lokal a gobierno ti Balaoan, La Union ti fuel subsidy para kadagiti mannalon ken mangngalap a residente ti ili idi malem kalman, Marso 12.
Daytoy nga inisiatiba ket naipatungpal iti sidong ti panangidaulo ni Mayor Carlo Castor U. Concepcion kas paset ti agtultuloy a tulongda iti agriculture ken fisheries sector.
Nakaawat ti 10-litro a fuel subsidy dagiti kualipikado a benepisiario a mangpalag-an iti epekto ti bigtime oil price hike ken mangsuporta iti kanayon a pagbiaganda.
Maipalagip nga immunan a nangipaay iti LGU ti fuel subsidy kadagiti Tricycle Operators and Drivers Association (TODA) Operators kas paset met iti suportada iti sektor ti transportasion.
Nakatuding ita nga aldaw, Marso 13 iti sumaruno a pannakaibunong dagiti subsidiya. Itay alas-otso ti bigat iti District 5, alas-nuebe ti District 6, alas-dyis District 7, ken alas-onse District 8.###
