Imbilin ni Department of Agriculture (DA) Secretary Francisco Tiu Laurel Jr. iti temporario a panangiparit iti panagangkat dagiti poultry products manipud idiay Indiana, US, gapu iti panagraira ti kaso ti H5N1 Avian Influenza wenno bird flu.
Karaman kadagiti naiparit a maangkat ket ti poultry meat, day-old chicks, itlog, ken dadduma pay a poultry-based products.
Panggep ti baro a pammilin a salakniban iti poultry industry ditoy Pilipinas kontra iti posible a panagserrek ti virus manipud ti nasao nga estado.
Mapalubusan a sumrek ditoy pagilian dagiti shipment a naipatulod manipud Estados Unidos sakbay a naipatungpal ti temporary ban ken naproseso wenno naparti sakbay ti Enero 30.
Nagpalagip iti ahensia a makumpiskar iti aniaman a shipment nga aglabsing iti baro a pammilin, kagiddan ti panagbantay kadagiti pantalan ti pagilian.###
