Pormalen nga inyakar ti Department of Justice (DOJ) sadiay Office of the Ombudsman ti intero a bileg da a desisyonan dagiti tallo a reklamo ti malversation a sangsangwen ni Senador Joel Villanueva.
Segun kenni Justice Spokesperson Attorney Polo Martinez, ti Ombudsman itan ti addan ti pinal a desisyon nu umdas metlaeng ti basaran tapno maipangato iti korte dagiti nasao a kaso.
Inlawlawag ti opisyal a ti nagbalin nga laengna nga akem ti DOJ iti isyu ket ti panangisayangkat ti inisyal nga imbestigasyon kalpasan nga i-deputize wenno pormal nga imbilin ti Ombudsman nga iggeman dagiti reklamo.
Inlawlawag met ni Martinez a maibasar ti linteg ket otomatiko a sumrek iti eksklusibo nga hurisdiksyon ti Office of the Ombudsman dagiti nangangato nga opisyales ti gobierno a karaman kadagiti addaan ti Salary Grade 27 agpangato.
