Inpanawagan ti Malacañang iti panagtitinnulong ken panagkaykaysa manipud iti publiko iti kangitingitan ti epekto ti krisis idiay Middle East.
Segun kenni Presidential Communications Office (PCO) Undersecretary Claire Castro, napateg iti panagtitinnulong kabayatan iti mapaspasaran ti pagilian a panagngato ti presio ti lana ken panagkapuy ti piso.
Impaganetget ni Castro nga ammo ni Presidente Ferdinand Marcos Jr. iti reklamo ti publiko, ngem saan a basol ti gobierno iti sitwasyon nga ingubuay ti tension iti nagbaetan ti Estados Unidos, Israel, ken Iran.
Prioridad ti Presidente iti agdama iti panangipaay ti ayuda, pakairamanan ti fuel subsidy ken financial assistance iti sektor ti transportasion, bayat iti panangbalanse iti pagsayaatan dagiti commuters ken drivers.
Paregtaen pay ti Malacañang iti publiko nga agtalek kadagiti addang ti gobierno ken makipamaysa iti tengnga ti agtultuloy a krisis.###
