Nainget nga inlibak ni Tingog Party-list Representative Jude Acidre dagiti akusasion a manginaig kenni sigud nga House Speaker Martin Romualdez iti aniaman nga anomalia, kalpasan nga inlawlawag ti Independent Commission for Infrastructure nga awan ti nakitada nga ebidensia kontra iti mammanday-linteg.
Segun kenni Acidre, nalawag iti referral a pinermaan ni retired Supreme Court Justice Andres Reyes nga awan ti “finding or conclusion of guilt” ni Romualdez, maisupadi iti palawag ni Navotas Representative Toby Tiangco.
Inlibakna pay iti alegasion a naaramat dagiti ayuda programs kas iti AICS, AKAP, ken TUPAD tapno pasuksokan dagiti mammanday-linteg nga agpirma iti impeachment complaint kontra kenni Bise Presidente Sara Duterte.
Impasingked ni Acidre a kasapulan ti natibker nga ebidensia ken saan a tsismis kadagitoy nga alegasion, ken kinaritna ni Tiangco a naganan dagiti mapapati a napasuksokan ken mangipila ti pormal a reklamo.
Impaganetgetna nga iti panagpirma ti impeachment ket nakabasar iti dokumento ken testimonia, ken nagpakdaar kontra iti pannakaiwaras dagiti palso nga impormasion a mangdadael iti integridad ti Kamara.###
