Ngimmato iti presio ti lana idi kalman kalpasan nga inpangta ti Iran nga iserrada ti Strait of Hormuz kas sungbat iti ultimatum ni U.S. President Donald Trump seknan iti naan-anay a pannakaipalukat daytoy.
Ti global benchmark a Brent crude ket ngimmato ti 1.69% wenno agarup $114.09 tunggal bariles. Ngimmato met iti krudo ti Estados Unidos ti 2% wenno $100.29. Segun kenni Goldman Sachs idi Biyernes, mabalin nga agtalinaed iti nangato a presyo aginggana 2027.
Maipalagip nga immunan nga inpangta ni Trump a dadaelen ti Estados Unidos dagiti power plants ti Iran no saan a maluktan manen ti Strait of Hormuz aginggana rabii ti Lunes.
Sinungbatan daytoy ti Iran a no aramiden ni Trump iti pangtana ket naan-anayda metten nga iserra iti strait ken agkedked a mangluktan aginggana saan a matarimaan ti aniaman a madadael a power plants.
Malaksid ditoy ket imbaga ti Iran a puntiryaen da met dagiti energy ken communications infrastructure ti Estados Unidos ken Israel iti rehiyon.
Adda itan ti maikapat a lawas iti gubat idiay Iran, a nakaigapuan ti dakkel a pannakasinga dagiti global oil markets, kangrunaan iti pannakaserra ti strait nga agserserbi a napateg a ruta para ti oil shipping iti lubong.###
