Imbilin ni PGen. Jose Melencio Nartatez Jr. ti nainget nga intelligence monitoring kadagiti nalatak nga online gaming platforms kas iti Roblox tapno malapdan ti dumakdakkel a pangta ti child explotation wenno ti pananggundaway kadagiti ubbing iti pagilian.
Direkta a binilinna ti Philippine National Police Anti-Cybercrime Group (PNP-ACG) nga ingetan ti panangmonitor kadagiti aktibidad iti online gaming, kalpasan dagiti report nga us-usaren daytoy dagiti kriminal a makiuman ken manggundaway kadagiti menor de edad.
Segun kenni Nartatez, makapadanag ti sitwasyon gapu iti kaadu dagiti agtutubo nga addaan access kadagiti nasao nga aplikasion.
Kas sungbat, makikoordinar met ti Philippine National Police iti Department of Information and Communications Technology (DICT) ken iti Cybercrime Investigation and Coordinating Center (CICC) tapno mangisayangkat ti naun-uneg nga imbestigasion ken mabigbig dagiti responsable kadagiti illegal nga aktibidad.
Daytoy nga addang ket paset ti pannakaipatungpal iti direktiba ni Presidente Ferdinand Marcos Jr. a papigsaen dagiti polisiya para iti kinatalged dagiti komunidad ken cyberspace, nangruna kadagiti agtutubo a Pilipino.###
