Naituding nga ipaulog ti Appeals Chamber ti International Criminal Court (ICC) ti desisyonna maipapan iti hurisdiksiyon ni sigud a Presidente Rodrigo Duterte inton Abril 22.
Segun iti Appeals Chamber, ipaulogda ti desisyon inton Abril 22 iti oras alas 5 ti malem, oras ditoy Pilipinas.
Immuna nga immapela ti legal team ti sigud a presidente, a nagkuwestiyon iti desisyon ti Pre-Trial Chamber I a mangipalubos iti piskal ti ICC a mangitultuloy iti panagdengngeg ti kaso ti sigud a presidente a crime against humanity.
Impaganetget ti kampo ti sigud a presidente nga awan ti turay ti ICC a mangimbestigar iti krimen a napasamak ditoy Pilipinas agsipudta immikkaten ti pagilian iti Rome Statute idi 2019.
