Nagpanawagan ni Presidente Ferdinand “Bongbong” Marcos Jr. kadagiti Pilipino nga arakupen iti namnama, panagkaykaysa, ken panangisakit bayat ti panangrambak ti pagilian iti Easter Sunday, a mangisimbolo iti panagungar ni Hesukristo ken panaggibus ti Semana Santa.
Iti mensahena, kenuna ti Presidente a makipampamaysa isuna iti sibubukel nga umili a Pilipino iti pannakarambak ti Paskua ti Pannakabiag.
Rambakan dagiti Pilipino a Kristiano daytoy nga aldaw a buyogen ti nauneg a debosion ken ragsak iti intero a pagilian tapno laglagipen ti panagungar ni Hesukristo kalpasan ti makalawas a panagmennamenna ken panagsakripisio.
Impaganetget ti Presidente nga iti okasion ket mangisimbolo ti balligi iti kinaawan ti namnama ken baro a pigsa babaen ti pammati. Pinaregtana dagiti umili nga ipabiag dagitoy a panangipateg babaen ti kinasayaat ken agtitipon a pagsungbatan tapno makabukel ti natibtibker ken sangkamaysa a pagilian.
Segun ti Presidente, iti kaawan ti tanem ket pammaneknek a naparmek ti biag iti ipapatay ken dakdakkel ti namnama ngem ti panagbuteng.
Innalukoyna dagiti Pilipino a makitinnulong iti panangibangon ti pagilian a nakaisigudan ti kinaimbag ken panagkaykaysa nga agserserbi a pigsa ti tunggal maysa. Innayonna, babaen ti pammati, panagayat iti pagilian, ken maymaysa a panggep, awan ti maartapan a pannubok.
Tarigagay a maipasdek ti “Bagong Pilipinas” nga iti panangisakit ken panangaywan kadagiti pada a tao iti agtultuloy a mangidepinar iti personalidad ti tunggal Pilipino.
Innayonna nga iti panaglabas dagiti henerasyon, ipalagip kadatayo ti Paskua ti Panagungar nga iti panagsakripisio ken ti panagsagaba ket panagrugi ti baro a namnama.
Kamaudiananna, impanawagan ti Presidente iti tunggal Pilipino a tumakder nga addaan iti napabaro a panggep, natibker a namnama, ken nauneg a responsibilidad iti maysa ken maysa, ken agbiag iti espiritu ti Paskua ti Panagungar iti inaldaw babaen ti panangaywan, kinamanangngaasi, ken panagkaykaysa.###
