Nagbalin a naannayas iti panang-obserbar ti Sabado de Gloria ditoy Siudad ti San Fernando, La Union agpada iti kabaybayan, merkado publiko, simbaan ken dadduma pay a pampubliko a lugar a dup-dupodopen iti tattao iti panawen ti semana santa.
Dinupudop dagiti pamilya ken grupo dagiti agga-gayyem iti beaches ditoy siudad, para iti simple a picnic iti kabaybayan.
Saan a nagbalin a lapped ti nabara a panawen, tapno aramiden a naragsak ti panagdigos ken panagpasyar iti naduma-duma a tourist destination, agraman iti kabaybayan.
Nakanayun iti ganaygay ti lugar dagiti aglaklako ti sorbetes ken dadduma a merienda a nagbalin a pangtapat ti nabara a panawen kabayatan ti panagrelaks dagiti bisita iti baybay.
Saan met a nagpaudi ti Ilocanos Beach, iti lugar a napigsa ti panaglakuan dagiti ihaw-ihaw a kas iti isaw, ulo ti manok, barbecue, ken dadduma pay a paborito nga street food dagiti bumisita iti lugar.
Segun kadagiti aglaklako, patok dagiti kabarbaro a naihaw a taraon kadagiti nagdigos ken nagpasyar kabayatan ken kalpasan ti panagdigos iti kabaybayan.
Tapno masigurado iti kinatalged dagiti umili ken bisita iti siudad, nakabantay iti City of San Fernando Police Station a kabinnulig dagiti dadduma pay nga ahensia ti gobyerno.
