Dinupudop dagiti tattao idi kalman aldaw ti Sabado de Gloria ti baybay a sakop ti Agoo, La Union. Manipud pay laeng iti bigat, makitan ti panagsasaruno dagiti sumrek a lugan ken panagdangpet dagiti umay a turista a mangrugrugi iti panagbakasyon ken panagrelaks iti baybay.
Nagbalin met nga alerto dagiti miyembro ti MDRRMO Agoo a nakapwesto iti lugar tapno siguraduen ti kinatalged dagiti umili ken bisita. Saan da laeng a nagmonitor no di ket agpaayda pay iti tulong no adda man ti emerhensiya a mapasamak bayat ti panaglangoy ken panagpasyar dagiti tattao.
Makita met dagiti ubbing a naragsak a nagtampisaw iti danum ti baybay. Saan laeng a dagiti ubing ti ag-enjoy, ta uray dagiti nagannakda ket kaduada a naglalangoy tapno mabantayanda dagiti annakda ken masigurado ti talgedda bayat ti panaglanglangoy.
Gapu iti napintas a panawen ken okasyon ti Semana Santa, namnamaen a agtultuloy pay ti panagdupudop dagiti bisita iton sumarsaruno nga aldaw, isu a palagipan dagiti publiko a tungpalen dagiti pagalagadan ken agannad tapno natalged ken naragsak ti selebrasyon ti Sabado de Gloria iti baybay ti Agoo.
