Nakairekord ti La Union Police Provincial Office (LUPPO) dagiti sumagmamano a vehicular traffic incident iti naglabas a Semana Santa, a mainaig iti panagadu dagiti turista ken motorista a simmangpet iti probinsya ti La Union.
Segun kenni PLTCol. Lawrence Ganuelas, PIO-LUPPO, nakairekord ti LUPPO iti agtultuloy a operasyon da ti 17 vehicular incidents. Nupay kasta, dagitoy ket napaspas a narespondehan dagiti kapulisan a naka-assign iti national highway babaen iti programa a “Lakbay Alalay,” a nangipakita iti nakasagana a seguridad ken tulong para kadagiti biyahero.
Inlawlawag pay ni Ganuelas a dagiti insidente ita a tawen ket nababbaba no ikumpara idi naglabas a tawen iti kapada nga okasyon, a nangipakita nga ad-adda a naurnos ken natalged ti panagbiyahe dagiti motorista iti probinsya.
Ita a nalpasen ti long weekend ken selebrasion ti Semana Santa, manamnama a nakaawiden dagiti turista iti nadumaduma a lugar. Gapuna, agtultuloy latta ti panakaipuwesto dagiti kapulisan, force multipliers ken friendly forces iti kalsada tapno mangited tulong ken assistance kadagiti agbiyahe.
Pakaammo ken pammagbaga ni Ganuelas kadagiti motorista ket agannad iti panagmaneho ken isagana ti bagi sakbay a bumiyahe. No naka-inom wenno adda hangover, masapul a ipark ti lugan iti natalged a lugar wenno ipa-drive iti tao nga ammona ti agmaneho tapno maliklikan dagiti aksidente.
Para kadagiti motorista ken turista a naggapu iti long weekend ditoy La Union, masapul a suroten dagiti traffic rules, agpatingga iti speed limit, ken siguradoen a nasaad ti kondisyon ti lugan sakbay a rumuar iti biyahe tapno natalged ti panagawid ti tunggal maysa. (Report by Bombo Lorie)
