Papigsaen ti Philippine National Police (PNP) iti operasyon kontra iti fuel pilferage wenno panagtakaw ken ilegal a panagurnong ti langis, segun kenni PNP chief Jose Melencio Nartatez Jr.
Daytoy ket kasaruno ti pannakadiskubre dagiti nakaikabilan ti diesel nga awanan ti permit iti maysa a residente compound idiay Quezon City. Nakumpiskar dagiti dram ti langis ken inreport dagiti residente iti mapagduduaan a panangiyakar ti fuel manipud iti tanker agturong iti babassit a container.
Mainaig ditoy, naibilin ti nainget nga imbestigasion ken monitoring karaman ti intelligence operations iti intero a pagilian, kadua ti Criminal Investigation and Detection Group (CIDG).
Immunan nga imbaga ti PNP a makikokoordinarda metten iti Department of Energy tapno masigurado ti natibker a kaso kontra kadagiti karaman, ken nagpakdaar a sumango iti linteg dagiti aglabsing.###
