BACNOTAN, LA UNION – Aktibo a nakipaset ti LGU Bacnotan iti Organization Development Design Meeting nga inangay ti Gawad Kalinga Foundation idi kalman, Abril 9, iti Center for Organization Research and Development ti Unibersidad ti Ateneo de Manila, nga indauluan ni Mayor Divine Fontanilla.
Nagbalin a sentro ti diskusion ti pannakapapigsa ti relasion ti lokal a gobierno ken ti GK Foundation tapno masigurado ti ad-adda nga epektibo a pannakaipatungpal dagiti programa para iti komunidad.
Nakatuding a mapalawa iti gannuatda ken ti GK tapno ad-adu nga umili ti magunggonaan iti serbisio ken proyekto ti lokal a gobierno.
Kadua ni Mayor Divine da Municipal Nutrition Action Officer ken GK Focal Person John Philip Gabriel, kenni Municipal Youth Development Officer Marc Jandel Buccat.
Daytoy nga addang ket paset ti agtultuloy a pannakikoordinar da Mayor Divine ken Bise Mayor Francis Fontanilla kadagiti nadumaduma nga ahensia, organisasion, ken institusion. Panggep ti administrasion nga agsapul kadagiti partners nga addaan ti maymaysa a panggep: ti agtultuloy a pannakapasayaat iti kasasaad ti panagbiag dagiti umili ti Bacnotan. (Report by Bombo Alphea)
Photo Courtesy: Bacnotan, La Union (FB)
