Nagpaputok ti flares iti puersa ti China kontra ti Philippine Coast Guard (PCG) aircraft kabayatan ti maritime patrol sadiay Kalayaan Island Group idi Abril 9, kagiddan ti panagrambak ti Araw ng Kagitingan.
Segun iti PCG, maysa daitoy nga insidente ti panang-harass sadiay West Philippine Sea, laksid ti desisyon ti United Nations tribunal idi tawen 2016 a pimmabor iti Pilipinas kasta met a nangkontra iti kalawa ti baybay a kayat a tagikwaen ti Beijing.
Inladawan ni Rear Admiral Jay Tarriela ti pasamak kas inggagara ken napeggad agsipud ta impasidong na ti alanganin ti biag dagiti nakasakay iti unarmed aircraft.
Napasamak ti insidente sadiay Panganiban Reef ken Zamora Reef, nu sadinno ket nangipatulod metlaeng ti radio messages ti China ken impaganetget ti “indisputable sovereignty” iti teritoryo – maysa a waragawag a segun iti PCG ket awan ti basaran na iti international law.
