Impasigurado ti Cybercrime Investigation and Coordinating Center nga awan ti takas-na wenno saan a makatakas dagiti pasimuno iti panangiwaras ti fake news online.
Segun kenni Undersecretary Renato ‘Aboy’ Paraiso, ti executive director ti ahensia, dagiti ‘contents’ a naglaun ti biddut nga impormasion ket ipreserba-da nga uray ikkaten ti nag-post wenno dagiti adda iti likudan ti panangiwaras ditoy.
Imbinglay ti nasao nga opisyal a kadua-da ditoy dagiti ‘law enforcement agencies’ para iti maaw-awagan a ‘data preservations’.
Impakdaar ni Undersecretary Aboy iti publiko, kangrunaan dagiti adda iti likodan dagiti dakes nga aramid nga addaanda ti ig-iggaman nga ebidensya tapno mapilaanda ti maiyannatup a kaso.
Innayon na pay a saan a gandaten a padasen iti limitasyon wenno pagpatinggaan ti pasensya ti gobierno maipapan iti panagwaras ti biddut nga impormasyon.
Ken no iti ‘fake news’ ket adda pakainaiganna wenno makaapektaren iti seguridad ti pagilian, ken panagtalek ti tao iti gobierno, imballaag ti opisyal a saan da daytoy a palabasen.
Nangibinglay met ti pakaseknan ni Department of Information and Communications Technology Sec. Henry Rhoel Aguda maipapan iti saritaan a pananglaban kontra ti ‘fake news’.
Kenunana nga imbes a nakatutok ken nakapamaysa iti atensyon ti ahensia kadagiti programa nga ad-adda a makatulong iti publiko iti panagusar ti teknolohiya, maiyak-akar daytoy iti pananganup dagiti biddut nga impormasion online.###
