BACNOTAN, LA UNION – Naaramid ti napateg nga addang nga agturong iti nasaysayaat a serbisio ti salun-at, kalpasan a simmarungkar dagiti empleyado ti Bacnotan District Hospital (BDH) iti Municipal Health Office (MHO) para iti Benchmarking Activity.
Nakapamaysa iti aktibidad ti panagsursuro ken panangpapigsa iti pannakaipatungpal ti programa ti “PhilHealth YAKAP” ti lokal a gobierno ti Bacnotan.
Nabara ti panangpasangbay ni Mayor Divine Fontanilla iti delegasion ti BDH nga indauluan ni Chief of Hospital Dr. Zenserly Pagaduan.
Kangrunaan a panggep ti nasao a panagbisita ket tapno agbalin a benchmark wenno standard ti balligi ti MHO iti pannakaipatungpal dagiti programa ti PhilHealth.
Malaksid ditoy, panggepna pay a mapatibker ti relasion dagiti ospital ti probinsia ken dagiti lokal nga opisina ti salun-at iti ili.
Paset met daytoy ti nalawlawa nga arapaap para iti Universal Health Care (UHC). Babaen ti umno ken organisado a “sistema ti panangiturong,” masigurado a ti medikal a serbisio nga awaten dagiti pasiente manipud iti lebel ti komunidad agingga kadagiti ospital ket naparpartak, nalaklaka, ken nangatngato ti kalidadna.
Iti panangidaulo da Mayor Divine Fontanilla ken Vice Mayor Francis Fontanilla, agtultuloy ti panangirugi ken panangsuporta ti lokal a gobierno kadagiti programa ti salun-at a direkta a pakagunggonaan ti tunggal Bacnotanean.
Ti panagkaykaysa ti BDH ken MHO ket pammaneknek a babaen ti panagtitinnulong, ad-adda a mapadur-as ti sistema ti salun-at ken masigurado a masakbayan para iti sibubukel nga umili. (Report by Bombo Alphea)
