CITY OF SAN FERNANDO, LA UNION – Nangrugi ti KADIWA sa Lungsod Week ita nga aldaw, Abril 13, 2026, idiay People’s City of San Fernando, La Union, ken agpaut agingga iti Abril 17.
Naisayangkat ti nadakamat a programa kas paset ti agtultuloy a suporta para iti lokal nga agrikultura ken pagbiagan.
Panggep ti KADIWA sa Lungsod nga iyasideg dagiti presko, makabael, ken de kalidad a produkto ti agrikultura manipud kadagiti lokal a mannalon ken mangngalap kadagiti consumers.
Segun kenni Elena Balanon, maysa kadagiti aglaklako iti KADIWA, dakkel a tulong ti nasao a programa iti negosioda gapu ta adda gundaway a direkta a mailako iti apitda manipud iti talon.
Kinunana a kabaelanda ti aglako kadagiti puon ti kamote iti ₱25, idinto a ti katuray ket ₱10 agingga iti ₱15 ken ti puon ti sili ket ₱25.
Innayonna nga ikagkagumaanda a pagtalinaeden a presko dagiti produktoda babaen ti regular a panangiwarisda iti danum kadagiti nateng.
Impeksa pay dagiti nakipaset a mannalon ti panagyamanda iti Mayor ti siudad nga idauluan ni Mayor Dong Gualberto, iti panangipaayda iti umno ken libre nga espasio a paglakuanda.
Kabayatanna, naipalagip iti publiko nga itugotda dagiti bukodda nga eco-bags kas paset ti panangitandudo iti pannakakissay ti basura ken pannakasalaknib ti aglawlaw.
Daytoy a gannuat ket maibatay iti City Ordinance No. 2024 – 13 a panggep na a papigsaen ti pannakaipatungpal ti programa ti KADIWA ditoy siudad, bayat nga agtultuloy a maitandudo ti makabael a taraon ken suportaran dagiti lokal a pagbiagan. (Report by Bombo Ericka)
