Impadamag ti Department of Energy (DOE) a dumanon iti 64 nga aldaw iti suplay ti langis ti pagilian.
Segun kenni Energy Secretary Sharon Garin, manipud iti 50.31 day average, nanayunan daytoy ti 14 nga aldaw gapu kadagiti baro nga order a sigurado a maideliver.
Segun iti DOE, iti supply tunggal produkto a petrolyo ket dagiti sumaganad: gasolina (54.38 nga aldaw), diesel (48.9), LPG (36.27), kerosene (104.73), jet fuel (67.65), ken fuel oil (45.96 nga aldaw).
Nupay kasta, inlawlawag ti sekretario a saan a mabalin ti agidulin ti 90 agingga 120 nga aldaw a suplay gapu iti limitado nga storage ken agtultuloy a konsumo.
Innayonna pay, agduduma iti kinasigurado ti delivery depende iti pagilian a nagtaudan ken kita ti kontrata.
Iti laksid daytoy, inpasigurado ti DOE nga agtalinaed nga umdas dagiti suplay, bayat nga agtultuloy iti panangala ti kanayonan a lana iti tengnga ti tension idiay Middle East.###
