Impasigurado ni Agriculture Secretary Francisco Tiu Laurel Jr. nga agtalinaed nga umdas iti suplay ti bagas iti pagilian.
Segun kenni Laurel, ti posible a 20% a panagbaba iti produksion ti irik ket maibilang laeng a “worst-case scenario,” ken saan a manamnama a mapasamak gapu kadagiti addang nga ipatpatungpal ti gobierno.
Agnumnumar ti Pilipinas iti nawadwad a global rice supply, nangruna kadagiti kangrunaan nga exporters kas iti India ken Vietnam nga agdama iti peak harvest season.
Dandani metten napunno dagiti bodega ti National Food Authority (NFA) nga agserserbi a buffer stock ti pagilian.
Nangilatang pay ti ahensia ti ₱10 billion assistance package para kadagiti mannalon ken mangngalap, pakairamanan ti fuel subsidies ken dadduma pay a targeted interventions, a prioridad iti produksion ti bagas.
Nakasagana met iti gobierno a mangnayon ti ₱20 billion para iti farm inputs ken ₱10 billion para iti tulong kadagiti mangngalap tapno mataginayon ti panagbiagda.
Itandudo ti DA iti panagusar kadagiti alternatibo a solusion kas iti biofertilizers tapno maksayan ti panagdepende kadagiti nangina nga agricultural inputs.###
