CITY OF SAN FERNANDO, LA UNION – Napudot man wenno agtudo ti tiempona, adu latta dagiti umili a gumatgatang ti nalinis a mainum a danum iti maysa a water refilling station ditoy Siudad ti San Fernando, La Union.
Iti Yles Aqua Marica Water Refilling Station idiay Barangay Carlatan, mabalin a gatangen iti maysa a galon wenno 25 a litro ti danum iti balor a ₱30, bayat a ₱10 met ti 7 a litro. Nupay kasta, masapul nga adda bukodda a galon dagiti aggatang wenno aggatangda pay iti bukodda a galon sakbay a makasada ti danum.
Iti laksid ti panagngato dagiti presio dagiti gagatangen kas iti kuryente ken dadduma pay a gastos a kas ti seal, agtaltalinaed a nalaka iti presio ti danumda no idasig kadagiti dadduma a water refilling station a ₱35 agingga ₱40 kada galon.
Segun kenni Rosemari Orel, staff ti nakuna a water refilling station, masapul nga aggaget ita a panawen gapu iti panagngato dagiti presio dagiti gagatangen ken awan ti maganab a tulong manipud kadagiti nakatugaw iti gobierno.
Naipasdek idi 2015 ken nangrugi nga ag-operate iti isu met laeng a tawen ti water refilling station. Uray naglabas ti pandemya, nagtalinaed daytoy a natalged ken agtultuloy nga agserserbi kadagiti umili.
Kadagiti kayat a makagatang ti nalinis ken naimas a mainum a danum, mabalin a masarakan ti Yles Aqua Marica Water Refilling Station idiay Barangay Carlatan, ditoy San Fernando City, La Union. (Report by Bombo Jordan)
