Makipaset ti aganay 17k a soldado manipud nagduduma a pagilian ti maika-41 Balikatan Exercises inton sumaruno a lawas nga agpaot agingga Mayo 8, tapno pasayaaten pay ti kabaelan ti militar para ti land, air, sea, ken ti cyber domain.
Malaksid iti kangrunaan a puersa ti Pilipinas ken Estados Unidos, makipaset pay dagiti tropa manipud Australia, Japan, New Zealand, Canada, ken France, bayat a 17 a pagilian met ti makipaset a kas international observers.
Segun kenni Armed Forces of the Philippines (AFP) Education, Training and Doctrine Commander Major General Francisco Lorenzo Jr., tarigagay ti napalawa a panagsanay a papaigsaen kasta met ti modernisasyon ti Armed Forces, pakairamanan dagiti arawaten panggubat, taktika, ken estratehiya kontra kadagiti agbaliw-baliw a pangta ti seguridad.
Impaganetget met ni U.S. Marine Corps I Marine Expeditionary Force Commander Lieutenant General Christian Wortman a ti Balikatan Exercises ket pammaneknek ti 75-a-tawen nga alyansa ti Pilipinas ken Estados Unidos kasta met ti kooperasyon iti panangmintinir ti kinatibker ti Indo-Pacific.
Inlawlawag ti AFP a ti partisipasyon dagiti kaalyado a pagilian ket maiyannurot ti agraraira a Status of Visiting Forces Agreement (SOVFA) ken nakapamaysa iti depensa, ken saan a ti aniaman nga agresyon wennno probokasyon.
Nupay awan iti agdama nga ASEAN member nga addaan ti SOVFA ditoy Pilipinas, silulukat met ti AFP para ti posible a panangpalawa ti katulagan.
