REGION 1 – Dimmur-as iti produksion ti niog iti Rehion Uno iti maikapat a kuarter ti 2025, segun iti kaudian a report ti Philippine Statistics Authority (PSA)Region 1.
Iti datus ti PSA, nagtalinaed iti 17,807 metric tons ti pakabuklan a produksion ti niog manipud Oktubre agingga Disiembre 2025. Daytoy ket nangatngato ti 5.9 percent no ikumpara iti 16,812 metric tons iti kapada a panawen idi 2024.
Iti detalye ti report, napataud ti rehion iti 14,337 metric tons a naganus a niog iti maudi a kuarter ti 2025, a nangatngato ti 11.1 percent no iyarig iti 12,900 metric tons idi 2024.
Ngem iti benneg ti natangkenan a niog, nairekord ti 3,471 metric tons iti maikapat a kuarter ti 2025, a nababbaba iti 11.3 percent no ikumpara iti 3,912 metric tons iti kapada a bulan idi napalabas a tawen.
Innayon pay ti PSA a kaaduan wenno agarup 80.5 percent kadagiti naburas a niog iti rehion ket naganus, a mangipakita iti panagtalinaed ti napigsa a demand iti daytoy a produkto.
Agsipud ta agtultuloy iti panagdur-as iti sektor ti agrikultura iti rehion, namnamaen a maitultuloy pay ti panangsuporta iti industriya ti niog a mangted ti pagbiagan kadagiti mannalon ken mangpabileg iti lokal a ekonomia. (Report by Bombo Lorie)
