Pinalawa ti Coastal Underwater Resource Management Actions (CURMA) ti adbokasiyana para iti konserbasion ti pawikan ken marine resource babaen ti aktibo a pannakipasetna iti Department of Environment and Natural Resources (DENR)’s “DENR Express: Permitting on Wheels,” a nangrugi idi Abril 21 agingga 23, 2026 idiay SM City La Union.
Paset iti programa ti agtultuloy a gannuat ti DENR a mangiyasideg kadagiti nasken a serbisio ti ahensia iti publiko, pakairamanan ti naparpartak a pannakaproseso dagiti permit ken aplikasion, kasta met iti panangipaay ti pannakaammo maipapan ti panangsalaknib iti aglawlaw.
Segun kenni Carlos Tamayo, Executive Director ti CURMA, naawis ti organisasionda a makikadua iti DENR iti panangitandudo iti konserbasion iti igid ti baybay, partikular iti pannakasalaknib dagiti pawikan iti kabaybayan ti Region 1. Nangrugi ti panagtitinnulongda idi tawen 2010, no sadino a naitandudo dagiti programa para iti konserbasion ken rehabilitasion dagiti pawikan.
Iti nasurok sangapulo a tawen, intultuloy ti CURMA ti panangisayangkat kadagiti aktibidad a kas iti pawikan release, coastal clean-up drives, information campaigns, ken outreach kadagiti komunidad iti igid ti baybay. Agingga ita, nasurok a 54,000 a sea turtles ti sibaballigi a naisubli iti natural a pagnanaedanda iti taaw.
Kas mabigbigbig a boluntario nga organisasion, napadayawan ti CURMA iti Outstanding Volunteer Organization iti nasional kas panangbigbig kadagiti dakkel a kontribusionda iti pannakasalaknib ti aglawlaw ken panagdur-as ti komunidad.
Iti pannakipasetda iti DENR Express, ibinglay ti CURMA dagiti nadumaduma a programana iti benneg ti pannakasalaknib ti aglawlaw, edukasion, panagdur-as ti komunidad, ken panangtarawidwid iti rekurso iti aplaya nga addaan panggep a maparegta ti ad-adu nga umili a makipaset kadagiti aktibidad iti aglawlaw ken agbalin a paset ti pannakakonserba dagiti gameng ti baybay. (Report by Bombo Ericka)
Photo Courtesy: Curma (FB)
