Hinarang ti Iran dagiti dua a dumaldalyasat a barko sadiay Strait of Hormuz, segun ti semi-official Tasnim News Agency, iti kangitingitan a tensyon ti rehiyon ken saan pay a nalawag nga estado ti ceasefire negotiations.

Insayangkat ti Islamic Revolutionary Guards Corps ti panagharang gapo iti mapapati a maritime violations, ken inturong da dagitoy iti kosta ti Iran.

Daitoyen ti kaunaan nga aktuwal a panagharang kadagiti barko manipud idi napartuat ti nalawlawa a tensyon iti rehiyon.

Kagiddan na ket impadamag ti British maritime security agency a tallo pay a barko ti tinamaan ti bala kabayatan ti panagdalyasat iti ruta.

Kinuna ni U.S. President Donald Trump a temporario a maipasardeng ti panagraut idiay Iran kalpasan ti kiddaw dagiti Pakistani mediators, nupay agtaltalinaed a saan a nalawag nu agtuloy dagiti peace talks. Impaganetget na met nga agtalinaed iti presensya ti U.S. naval blockade.

Inawagan met ti Iran ti nasao a blockade a kas “act of war” ken nagpangta a naan-anay da a harangan ti Strait of Hormuz agingga agtultuloy ti panag-harass ti Estados Unidos.

Agtaltalinaed a nagulo ti sitwasyon kabayatan a saan a nalawag ti direksyon ti ceasefire, gapo iti saan a natuloy a taripnong dagiti delegasyon ti U.S. ken Iran idiay Islamabad.