Pinasingkedan ti Department of Migrant Workers (DMW) a natalged ken saan a nadangran dagiti 15 a Filipino seafarers kalpasan nga hinarang dagiti puersa ti Iran dagiti naglugananda a barko idi Abril 22.
Segun kenni DMW Secretary Hans Leo Cacdac, karaman dagiti Pilipino kadagiti tripulante ti MV Epaminondas ken MSC Francesca, nga agpada a nanggandat a pumanaw iti Strait of Hormuz sakbay a napasardeng ken naiturong iti sabali a direksion babaen kadagiti Iranian maritime units.
Sangapulo kadagiti Filipino ti naglugan iti Epaminondas, idinto a lima ti naglugan iti MSC Francesca. Agtalinaed dagiti dua a barko iti kabaybayan a sakop ti Iran.
Agtultuloy iti komunikasion ti DMW kadagiti pamilia dagiti seafarers, kasta met kadagiti manning agencies ken makinkukua ti barko, tapno masigurado ti kasasaadda.
Kanayunan daytoy iti agsasaruno nga insidente iti kabaybayan ti rehion sipud pay idi Pebrero, a mainaig iti kumarkaro a tension a nangapektar kadagiti global shipping lanes.
Nupay adda iti nasayaat a kasasaad dagiti seafarers, agataltalinaed iti panagdanag dagiti pamiliada bayat nga agtultuloy ti diplomatic standoff.
Inkari met ti DMW iti agtultuloy nga updates maipapan iti negosasion para iti pannakapalubos dagiti barko.###
