Nagpanawagan ni Leandro Leviste iti Office of the President nga imbestigaran dagiti report ti diskriminasion iti pannakaipaay ti ayuda.
Iti press conference idi Biernes iti House of Representatives, imbutaktak ti mammanday-linteg a maipagarup a maysa a kapitan ti mapapati a binagaan ti presidente ti Liga ng Barangay idiay Batangas a saanda a maikkan ti ayuda gapu ta “agtamtampo” kano kadakuada ni Vilma Santos-Recto.
Segun kenni Leviste, naidanondan ti isyu iti Malacañang, ken impanamnama ti Palasyo nga ihabol iti ₱200,000 para kadagiti barangay a saan a nairaman iti pannakaibunong ti tulong.
Nagpanawagan met isuna kenni Presidente Ferdinand Marcos Jr. nga ited iti nadakamat a gatad kadagiti saan a nairaman a barangay ken imbestigaran iti pannakaiwaras ti tulong a mapapati nga indauluan ni Executive Secretary Ralph Recto.
Immapela met ti mammanday-linteg a suspendiren iti excise tax ken value-added tax iti langis tapno saanen a maapektaran iti publiko iti kunana a biddut a sistema ti panagiwaras.
Mainaig iti daytoy, nangipila ni Leviste ti House Resolution a mangal-allukoy iti Office of the President a mangimbestigar iti posible a diskriminasion ken korapsion kadagiti ayuda programs tapno masigurado ti transparent, patas, ken epesiente a panangipaay ti pondo kadagiti lokal a gobierno.###
