Imbilinen ti Department of Environment and Natural Resources (DENR) iti dagos a panagsardeng ti operasion dagiti amin nga open ken controlled dumpsites iti intero a Pilipinas, tapno maliklikan iti aniaman a didigra iti tengnga ti mapaspasaran a nakaro a bara ti panawen.
Maibasar iti memorandum nga inruar ni DENR OIC Assistant Secretary for Environment ken concurrent Environmental Management Bureau (EMB) Director Jacqueline Caancan, direkta a nabilin amin nga EMB regional offices a tutukan iti nasao a pammilin tapno masalakniban iti salun-at ti publiko ken ti aglawlaw.
Kagiddan ti panagpasirra, nangipaay met ti ahensia ti 15-day ultimatum kadagiti operators ti sanitary landfill a mangipasa ti contingency plan.
Nakapaisidong iti nasao a plano dagiti kongkreto nga addang nga aramiden dagiti pasilidad tapno maliklikan ken napartak a masungbatan iti pangta ti uram ken dadduma pay a posible nga emerhensia.
Impaganetget ti DENR nga iti nainget a panangipatungpal ti safe closure ket rehabilitasion dagiti dumpsite ket napateg tapno maiyadayo iti peggad iti publiko ken dagiti sanikua.
Malaksid iti panagpasirra ken panagkiddaw ti plano, nabilin met dagiti regional office ti EMB a mangisayangkat ti nainget a beripikasion iti agdama nga estado dagiti naisirra a pasilidad.
Obligado met iti ahensya a mangipaay daytoy ti maiyannatup a technical assistance kadagiti lokal a gobierno para iti naur-urnos a panangmanehar kadagiti solid waste.###
