Dumanon ti 539 a kabigian dagiti biktima ti maipagarup nga extrajudicial killings (EJK) iti nagaplikar kas “participating victims” iti kaso kontra kenni sigud a Presidente Rodrigo Duterte iti International Criminal Court (ICC), para iti panggep nga idanon iti kapanunutanda iti proseso ti panagusig.
Segun kenni ICC Assistant to Counsel Atty. Maria Kristina Conti, saan a kasapulan a tumestigo dagitoy agsipudta naisinada kadagiti testigo a pilyen ti Prosecution ken Defense.
Sakop laeng ti kaso dagiti insidente manipud Nobyembre 2011 agingga Marso 2019.
Innayon pay ni Conti, mabalin a mangipaay iti ICC ti konsiderasion kenni Duterte, karaman iti pannakipaset iti panagdingeg babaen ti video call, a posible a mangrugi ita a tawen.
Immunan a tinakderan ti nasao a korte iti hurisdiksion daytoy ken kinumpirma dagiti reklamo kontra kenni Duterte mainaig iti crimes against humanity, karaman ti murder ken attempted murder, a maipagarup a paset iti nalawa ken sistematiko a panagatake kontra kadagiti sibilyan.###
