Tuloy iti posible a maudi a panagdengeg iti dua nga impeachment complaint kontra kenni Bise Presidente Sara Duterte ita nga aldaw ti Mierkules, Abril 29, segun kenni House Committee on Justice chair Gerville Luistro.
Daytoy ket iti laksid dagiti petisyon tapno ipasardeng iti impeachment hearing.
Segun iti mammanday-linteg, nakadependir kadagiti miembro ti justice panel no ikonsiderada iti naipila a reklamo iti korte para iti panangdetermina ti probable cause.
Nupay kasta, ituloyda iti panagdingngeg ken palpasen iti panangtakuat ti probable cause iti impeachment complaints.
Idi Lunes, nangipila iti kampo ti asawa ni VP Sara a ni Atty. Manases Carpio ti reklamo kontra kenni Luistro ken dadduma pay a miembro ti Justice panel iti Quezon City Prosecutor’s Office nga adda pakainaiganna iti maipagarup a panaglabsing ti Bank Secrecy Law, Data Privacy Act, ken Anti-Money Laundering Act gapu iti panangibutaktak ti bank transactionsda nga agassawa iti impeachment hearing idi Abril 22.###
