Immapela ti kampo ni sigud a Presidente Rodrigo Duterte kontra iti desision ti International Criminal Court (ICC) a kumpirmaren dagiti kaso a naipila kontra kenkuana.
Iti 18-panid a dokumento a naisubmitir iti ICC Pre-Trial Chamber I, impaganetget ti depensa a nagbiddut ti korte a nangipalubos nga umabante ti kaso, nga inawaganda nga “impermissibly flexible” iti panangbukel dagiti akusasion.
Segun iti kampo ni Duterte, saan a nalawag iti ebidensia a nagbasaran ti korte a nangaprobar kadagiti kaso, a kunada a mabalin a mangapektar iti panagbalin a patas ken naurnos a proseso ti panagusig.
Sumangsango ni Duterte ti tallo a bilang ti crimes against humanity a mainaig kadagiti pammapatay iti sidong ti war on drugs, ken agdama a nakadetain idiay The Hague sipud pay idi Marso 2025.
Kabayatanna, nabukel metten ti Trial Chamber III ti ICC a mangasikaso iti kaso, nga agserbi a sumaruno a tukad ti panagdingeg kontra iti sigud a presidente.###
